Mihi na te Tumuaki

Papā te whatitiri

Hikohiko te uira

Kahukura ki te rangi

Ka rū te whenua

Ka rū o runga te whenua

Ka rū o raro te whenua

Kia ōiōi kia ōiōi

Ka tere ngā whetū ki runga

Hikoikoia te mārama i te pouri o te pō

Kia tū kia whaia, whaia, whaia ko te rangimarie…..

Tīhei mauri ora!

I ngā rā o nehe i whakatūria ai e o mātau tīpuna he whare wānanga, he whare maire hei whare ako mo rātau. He mea whāngai ngā kōrero ki ngā whakatipuranga hei oranga mo rātau. Ko ngā pou whenua e whā kei roto i te rohe o Raukawa e mihi ana; ko te Pae o Raukawa, Te Kaokaoroa o Pātetere, Wharepuhunga me Maungatautari. Kātahi ka “whakareia te kakara o te hinu Raukawa.”

I kawea mai e Hoturoa ngā kōrero o Tainui waka, ā, ka tukua iho ki ngā uri o Māhinarangi rāua ko Tūrongo, ka puta mai ko Raukawa. Mai ēnei whare maire ka rongo te tongi a Tāwhiao, “Māku ano tōkū whare e hanga, ko ngā pou o roto he patete, he mahoe, ko te tāhuhu he hīnau.”

E pupuri tonu ana tēnei rohe i ngā āhuatanga o te kīngitanga, kāre i tua atu o tēnei.

Ko Mokau ki runga, ko Tamaki ki raro, ko Mangatoatoa ki waenganui, ko Pare Hauraki, ko Pare Waikato, ko Te Kaokaoroa o Pātetere, koia nei te rohe e kōrerohia nei.

Tutu mai ana ngā whare maire i roto i ngā hapū, kātahi ka pu tate whakaaro i te tau 1992 kia whakatūhia he kura mo ngā hau e whā e noho ana i roto i te rohe o Raukawa. Ko ngā mātāwaka o tēnā rohe, o tēnā rohe i kawea mai o rātau mātauranga. Na konei i tautokohia tētahi Kohanga reo kia noho te kura ki waenganui i a rātau. Nā wai rā ka tohe tonu te whānau ki te Tāhūhū o te Mātauranga kia whai mana a Te Kura Kaupapa Māori o Te Hiringa. Ko ngā mātāpono o Te Aho Matua e whai mana ana i roto i ngā mahi a Te Kura Kaupapa Māori o Te Hiringa ki Tokoroa.

Nau mai haere mai e te tī, e te tā ki

Te Kura Kaupapa Māori o Te Hiringa.

 

Waiata